Ályktun aðalfundar ÍMR um skipulagsmál
Borgarráð Reykjavíkur
Þórdís Lóa Þórhallsdóttir formaður
Ályktun:
Aðalfundur Íbúasamtaka Miðborgar
Reykjavíkur haldinn í Iðnó 15. október 2018 lýsir yfir vonbrigðum með að
skipulagsyfirvöld í Reykjavík og þar með talið borgarráð taki ítrekað ekki
til greina athugasemdir íbúa miðbæjarins í deili- og skipulagsmálum, oft
um breytingar sem skerða hagsmuni og lífsgæði íbúanna verulega. Fundurinn
skorar á borgarráð að taka meira tillit til almennra og víðtækra
athugasemda íbúanna enda sé það í anda þess
íbúalýðræðis sem er yfirlýstur vilji borgarstjórnar.
Greinargerð:
Mikil framkvæmdagleði ríkir nú í
miðborg Rekjavíkur, hver stórbyggingin af annari rís um þessar
mundir og miklar breytingar hafa orðið á rekstri og þjónustu. Íbúar
miðborgar Reykjavíkur hafa lengi setið uppi með þá súru tilfinningu að
fyrirhugaðar breytingar á nærumhverfi þeirra séu illa kynntar og að lítið
tillit sé tekið til athugasemda þeirra finnist þeim framkvæmdirnar skerða
hagsmuni sína og lífsgæði enda virðast engar reglur gilda um það hvernig
bregðast skuli við athugasemdum við skipulagsbreytingum aðrar en þær að
þeim skuli svarað. Þau svör eru oft í skötulíki eins og túlkun
skipulagsyfirvalda á því hvað teljist til meiriháttar breytinga í rekstri
en dæmi eru um að málningavöru- og matvöruverslunum sé breytt í háværa
næturklúbba án þess að nágrönnum gefist nokkur kostur á að tjá sig um það.
Tvö dæmi um afgreiðslu skipulagsráðs skulu hér tíunduð en það eru nýlegar
deiliskipulagsbreytingar sem varða Barónsstíg 28 og Hallveigarstíg 1 en
þær eru á margan hátt dæmigerðar fyrir afgreiðslu skipulagsyfirvalda á breytingatillögum.
Barónsstígur 28
Saga byggingaframkvæmda á
Barónsstíg 28 er umhugsunarverð en þar stóð áður friðað hús, byggt 1905.
Sóst var eftir því að fá að rífa það eða flytja burt og mótmæltu
Íbúasamtök Miðborgar þeim fyrirætlunum árið 2013. Ekkert gerðist um
tveggja ára skeið nema það að húsið varð að dópgreni eða afdrepi fyrir
útigangsfólk en árið 2015 var gefið leyfi til að byggja fjölbýlishús,
fjórar hæðir og kjallara með tíu íbúðum og er það sú bygging sem nú er
risin en friðaða húsið var fjarlægt. Sótt var um leyfi 2016 til að breyta
húsinu í gististað í flokki II, með 10 gistieiningum en því var synjað.
Þessi krafa eigendanna rís enn á ný 2017 enda voru þeir byrjaðir að reka
gististarfsemi í húsinu ólöglega. Ekki er gott að sjá hversvegna ljáð var
máls á breytingunni en skipulagsráð samþykkti hana þrátt fyrir fjölda
athugasemda frá nágrönnum og frá Íbúasamtökum Miðborgar og yfirlýsta
stefnu borgaryfirvalda um að ekki yrði gefin leyfi fyrir fleiri hótelum í
miðborginni. Í athugasemdum Íbúasamtakanna sagði m.a:
„Fólk þarf að geta treyst því að ákvarðanir
stjórnvalds standi, sérstaklega ef það varðar búsetu þess en íbúðakaup eru
stærsta fjárfestingin í lífi flestra. Nágrannar og aðrir íbúar í
miðborginni gera þá kröfu til skipulagsyfirvalda í Reykjavík að þau
framfylgi stefnu borgarinnar um að ekki rísi fleiri hótel í miðborginni,
að umsókn um gististarfsemi í húsinu verði aftur synjað og að yfirlýstur
tilgangur þessarar byggingar
um að hún verði fjölbýlishús standi.“
Ekkert mark var
tekið á athugasemdum nágranna og ÍMR.
Hallveigarstígur 1
Nýlega var samþykkt
deiliskipulagsbreyting á reit sem afmarkast af Skólavörðustíg,
Bankastræti, Ingólfsstræti, Hallveigarstíg og Bergstaðastræti um að leyfa
útveitingastað norðan við Hallveigarstíg 1 (húsið þar sem Bónus og
Samfylkingin hafa aðsetur). Þarna í kring er þétt íbúabyggð og þegar
nágrannarnir fengu veður af þessari breytingartillögu fóru 20 þeirra fram
á að hún yrði grenndarkynnt á öllum reitnum því slík starfsemi hefði
óhjákvæmilega mikil áhrif á nærumhverfið en nágrannarnir hafa mikla
reynslu af útiveitingastöðum og því ónæði og ágangi sem þeim getur fylgt.
Þeirri beiðni var ekki einusinni svarað. Hátt á þriðja tug athugasemda
bárust úr nánast öllum húsum í nágrenninu en allt kom fyrir ekki,
deiliskipulagsbreytingin var samþykkt þó engin knýjandi nauðsyn sé á því
að koma upp veitingastað á þessum stað því nú þegar eru tíu veitingastaðir
fyrir á reitnum og í næsta nágrenni
við reitinn er einnig fjöldi veitingastaða.
Lokaorð
Íbúar miðborgarinnar eru hugsandi yfir
afgreiðslu þessara tveggja mála og reyndar fleiri mála sem ekki verða
tíunduð hér en snúa mörg hver að hótel- og veitingahúsavæðingu
miðborgarinnar. Á aðalfundinum lýstu margir yfir furðu sinni á því hve
léttvægar athugasemdir íbúanna virðast vera þegar kemur að
skipulagsbreytingum. Stjórn Íbúasamtaka Miðborgar Reykjavíkur skorar á
Borgaráð Reykjavíkur
að gera bragarbót í þessum efnum.
Reykjavík 23. október 2018
F.h. Íbúasamtaka Miðborgar Reykjavíkur
Benóný Ægisson formaður
Tilbaka
|
